Hópmálsókn vegna gallaðra lyklaborða á MacBook Pro
Apple hefur fengið á sig hópmálsókn vegna lyklaborða á MacBook Pro en hópur notenda hefur kvartað yfir endingu á "butterfly" lyklaborðinu og vill meina að stafirnir eigi til að festast eða hreinlega detta af.
Þetta er svo sem ekki í fyrsta skipti sem Apple fær á sig málsókn en t.d. samdi Apple um viðgerðir á iPhone 6 símum vegna rafhlöðuvanda sem rekið var til stillinga í stýrikerfi símanna, iOS, en þar voru símarnir viljandi gerðir kraftminni til að lengja líf rafhlöðunnar. Apple féllst á að skipta um rafhlöður í þeim símum, notendum að kostnaðarlausu.
Það kemur í ljós á komandi vikum hvað verður um þessa málsókn en þess má geta að á Íslandi er 2 ára ábyrgð á Apple vörum og geta notendur farið með vélarnar í Epli, umboðsaðila Apple á Íslandi, ef þeir verða varir við einhver vandamál.
